Cumhachd agus co-dhùnaidhean san RADeamocrasaidh agus Pàrlamaid na RA

'S e deamocrasaidh a tha san Rìoghachd Aonaichte (RA). Tha cus dhaoine san RA airson am beachd fhaighneachd dhaibh, agus cus cho-dhùnaidhean ri dhèanamh, agus mar sin, tha riochdairean air an taghadh airson co-dhùnaidhean a dhèanamh.

Tha riochdairean a' gabhail a-steach Buill Phàrlamaid (BP), Buill Pàrlamaid na h-Alba (BPA) agus comhairlichean ionadail.

Bhidio - Pàrlamaid na RA

Coimhead a' bhidio seo a tha a' mìneachadh Pàrlamaid na RA agus dè an obair a bhios BP agus Morairean a' dèanamh.

Dè th' anns na diofar phàirtean de Phàrlamaid na RA?

Bidh Pàrlamaid na RA a' coinneachadh ann a' Westminster ann an Lunnainn. Tha trì pàirtean innte:

• Taigh nan Cumantan – A' deasbad mholaidhean agus a' dèanamh laghan
• Taigh nam Morairean – A' sgrùdadh laghan a tha san amharc, a' dèanamh atharrachaidhean
• An Crùn – A' Mhonarcachd, Ceannard na Stàite, a' ceadachadh laghan

Taigh nan Cumantan

Tha an Rìoghachd Aonaichte air a roinn ann an 650 roinn-phàrlamaid no sgìre. Bidh gach roinn-phàrlamaid a' taghadh aon BP airson na Pàrlamaid.

Dè am pàirt a tha aig BP ann am Pàrlamaid na RA?

'S e fear de na rudan a dh'fheumas BP ann am Pàrlamaid na RA a dhèanamh, muinntir na roinn-phàrlamaid aca a riochdachadh air cuspairean far am bi Pàrlamaid na RA a' dèanamh cho-dhùnaidhean, me in-imrich no dìon na dùthcha. Bidh BP an dara cuid a' deasbad no a' cur cheistean ann an Taigh nan Cumantan, no bidh iad ag obair ann am buidhnean nas lugha ris an canar comataidhean.

An lùib rudan cudromach eile a bhios BP sa Phàrlamaid a' dèanamh, bidh iad a' cuideachadh le bhith a' dèanamh laghan agus a' sgrùdadh obair an riaghaltais no a' rannsachadh chùisean.

Taigh nam Morairean

'S e Taigh nam Morairean an dara seòmar ann am Pàrlamaid na RA. 'S e obair Taigh nam Morairean cuideachadh le laghan a dhèanamh, a bharrachd air a bhith a' sgrùdadh obair an riaghaltais agus a bhith a' rannsachadh chùisean.

Cò bhios a' cur nam morairean an dreuchd?

Bidh a' mhòr-chuid de mhorairean air an cur an dreuchd leis a' mhonarc an dèidh comhairle bho phrìomh mhinistear mar chomharra air an eòlas a th' aca ann an raon air choreigin, me gnothachas, lagh no saidheans. Tha cuid eile agus 's e easbaigean ann an Eaglais Shasainn a th' annta, agus tha 92 nam morairean tron teaghlach aca no nan daoine le tiotalan (mar na Barain is na Biocasan no Viscounts).

An Crùn

Canar monarcachd bhun-reachdail ri siostam poilitigeach na RA leis a' mhonarc na Cheannard Stàite.

Ach 's e Taighean na Pàrlamaid a bhios a' dèanamh nan laghan againn, agus chan e am monarc.

Nuair a gheibh Bile Phàrlamaideach an t-Aonta Rìoghail, bidh e an uair sin na Achd Pàrlamaid. Tha e an uair sin an urra ris an roinn bhuntainneach dhen riaghaltas an lagh sin a chur an gnìomh. Mar eisimpleir, bidh roinn na Còmhdhail a' dèiligeadh ri Achdan ùra a' buntainn ri còmhdhail.

Chan fhaod am monarc taobh a ghabhail ann am poilitigs agus cha bhi iad a' gabhail gnothach ris a' phròiseas reachdail. Cha tug monarc Aonta Rìoghail ann am pearsa o chionn còrr is 150 bliadhna agus cha do dhiùlt iad a thoirt o chionn còrr is 300 bliadhna.

Gach bliadhna bidh am monarc a' dol a Thaigh nam Morairean a dh'fhosgladh seisean ùr dhen Phàrlamaid. Bidh am monarc a' leughadh òraid ag innse na tha an riaghaltas an dùil a dhèanamh air a' bhliadhna a tha romhpa. 'S e am Prìomhaire a bhios a' sgrìobhadh na h-òraid.

Bhidio - A' gabhail ri reachdas

Coimhead a' bhidio seo a tha a' mìneachadh mar a tha laghan gan cruthachadh.